Inc Arian Ailgylchadwy ar gyfer Dyfeisiau Electronig Argraffedig

Ar ôl sylwi faint o wastraff arian a gâi ei gynhyrchu gan ei brosiectau ymchwil bach/yn y labordy, lle defnyddir cyfran fechan yn unig o’r deunydd a ddefnyddir mewn gweithrediadau masnachol, ceisiodd James feddwl am ffordd o leihau’r gwastraff a gynhyrchir. Ar hyn o bryd, defnyddir inciau arian mewn dyfeisiau electronig argraffedig, megis nwyddau traul, paneli solar, deunyddiau pacio clyfar, synwyryddion a dyfeisiau y gellir eu gwisgo. Mae’r dulliau a ddefnyddir ar hyn o bryd i adfer arian o ddyfeisiau electronig argraffedig yn defnyddio cemegau gwenwynig iawn. Trwy ddefnyddio’r cemegau hyn gellir adfer arian gwerthfawr, ond maent yn cynhyrchu gwastraff gwenwynig ac yn atal yr arfer o ailgylchu yn ystod rhannau eraill o’r broses. Rhaid i’r arian a gaiff ei adfer yn sgil y dulliau hyn gael ei brosesu ymhellach cyn y gellir ei ailddefnyddio.

Mae dull arloesol James yn defnyddio inc arian a grëwyd yn arbennig ac sy’n gallu dargludo trydan i’r un graddau ag arian a ddefnyddir yn fasnachol, ynghyd â phroses adfer unigryw. Yn sgil y broses hon, gellir adfer gronynnau arian o’r cynnyrch terfynol heb ddefnyddio cemegau gwenwynig, ac o’r herwydd gellir ailgylchu’r swbstrad trwy ddefnyddio’i ffrwd wastraff ei hun. Ymhellach, gellir ailddefnyddio’r arian a adferir yn sgil y broses hon i greu inciau arian newydd heb fod angen unrhyw waith prosesu pellach – mae hyn yn arbed ynni ac yn lleihau costau.

Wrth dreialu’r dull hwn yn y labordy, dangoswyd bod modd adfer yr arian o swbstrad papur gyda lefel effeithlonrwydd o 94%, a hynny trwy ddefnyddio dŵr yn unig. Mae cynhyrchu inc arian ecogyfeillgar yn cynrychioli’r cam cyntaf tuag at greu dyfeisiau electronig argraffedig gwirioneddol ailgylchadwy.

Mae’r llwyddiant hwn wedi arwain at weithio gydag AgorIP i gyflwyno cais am batent i ddiogelu’r inc a’r dull adfer. Caiff cynllun AgorIP ei gefnogi gan Lywodraeth Cymru a Chronfa Datblygu Rhanbarthol Ewrop, a thrwy hyn bu modd inni ariannu chwiliadau cychwynnol ac astudiaethau ymchwil i’r farchnad, ynghyd â’r gwaith o lunio a chyflwyno’r cais am batent. Mae’r cais wedi cael ei anfon at Swyddfa Eiddo Deallusol y DG (UKIPO) ac rydym yn aros i’r patent gael ei gymeradwyo!

Rydym yn llawn cyffro o gael bod yn rhan o’r gwaith arloesol hwn, ac edrychwn ymlaen at weld sut y bydd dulliau Dr Claypole yn datblygu yn ystod y misoedd nesaf!

I gael rhagor o wybodaeth, cysylltwch â Dr Claypole ar [email protected].